वि.सं.   शनिबार, मंसिर २८, २०७६   तदनुसार  14 December 2019

बाघको आक्रमणबाट बर्दियामा एक जनाको ज्यान गयो

        बर्दिया अनलाईन   |   प्रकाशित मिति: बिहिबार, अशोज १६, २०७६ ।    
Loading...

बांसगढी (बर्दिया) : पाटे बाघको आक्रमणबाट बर्दियामा एक जना महिलाको ज्यान गएको छ । बाँसगढी नगरपालिका–२ स्थित भगवती सामुदायिक वनमा घाँस काटन गएका बेला पाटे बाघको आक्रमणमा परि बाँसगढी नगरपालिका २ राँझाकी ४० वर्षीया गंगा सलामी मगरको बुधबार बेलुका ज्यान गएको बर्दियाका प्रमुख जिल्ला अधिकारी रामबहादुर कुरुम्वाङ्गले बताए ।

‘बर्दिया राष्ट्रिय निकुञ्जका प्रमुख संरक्षण अधिकृत अणनाथ बरालका अनुसार बाघले मृतकको हात र घाँटीमा हानेको छ । उनलाई उपचारका लागि नेपालगञ्ज मेडिकल कलेज कोहलपुर लैजाँदै गर्दा बाटोमा नै ज्यान गएको हो । एक साताअघि भगवती सामुदियक वनमा घाँस काटन गएकी एक महिला लक्ष्मी मल्ललाई पनि पाटे बाघले आक्रमण गर्दा घाइते बनाएको थियो । उनको नेपालगञ्ज मेडिकल कलेज कोहलपुरमा उपचार भैरहेको निकुञ्जले जनाएको छ ।

मंगलबार दिउँसो पाटे बाघले एउटा गोरु र ८ वटा बाख्रा समेत मारेको स्थानीयले जनाएको बर्दिया राष्ट्रिय निकुञ्जका प्रमुख संरक्षण अधिकृत अणनाथ बरालले बताए । निकुञ्ज भित्रबाट निस्किएर सामुदायिक वनमा समेत पाटे बाघले आक्रमण गरेपछि यस क्षेत्रका स्थानिवासी त्रसित बनेका छन् ।

बाघको आक्रमणबाट फेरि एक महिलाको ज्यान गएपछि बाघ हिंस्रक भएको हुन सक्ने भन्दै निकुञ्ज प्रशासनले क्यामरा ट्रयापिङ प्रविधिसहित निकुञ्ज सुरक्षार्थ नेपाली सेनाको टोली तैनाथ गर्ने जनाएको छ । त्यो बाघ नियन्त्रणका लागि तत्काल हात्तीसहित प्राविधिक टोली खटाइने प्रमुख संरक्षण अधिकृत बरालले बताए ।

७ महिनाको अवधिमा बर्दियामा पाटे बाघको आक्रमणमा परि हालसम्म ५ जनाको ज्यान गएको छ । यसअघि गेरुवा गाउँपालिकाको दङ्गपुर र ठाकुरबाबा नगरपालिकाको भुरिगाउँमा बर्दिया राष्ट्रिय निकुञ्ज भित्रबाट आएको पाटे बाघले आक्रमण गर्दा दुई जनाको ज्यान गएको थियो । यसैगरी बढैयाताल गाउँपालिकाको मैनापोखरमा नेपाल तथा भारतीय जंगलबाट र राजापुर क्षेत्रमा भारतीय जंगलबाट आएको पाटे बाघको आक्रमणमा परि दुई जनाको ज्यान गएको थियो ।

पाटे बाघको आतंक बढिरहेको भन्दै बर्दिया निकुञ्ज अन्तर्गत मध्यवर्ति क्षेत्रका सामुदायिक वनभित्र घाँसदाउरा लिन जंगलभित्र प्रवेश नगर्न जिल्ला प्रशासन कार्यालय बर्दियाले आग्रह गरेको प्रमुख जिल्ला अधिकारी रामबहादुर कुरुम्वाङ्गले बताए ।

प्रतिक्रिया दिनुहोस्: